एमालेका सांसदहरुले पार्टीले कार्यवाही गरेका सांसदलाई पदमुक्त गरी कायवाही प्रक्रिया अघि बढाउन दबाव दिँदै सभामुखको च्याम्बर घेराउ गरेका छन् ।
सिंहदरबारस्थित सभामुखको कार्यकक्षमा नेकपा एमालेका सांसदहरुले पार्टीले कार्यवाही गरेका सांसदलाई पदमुक्त गरेको सूचना तत्काल टाँस गर्न माग गर्दै सभामुख अग्नि प्रसाद सापकोटाको च्याम्बर घेराउ गरेका छन् ।
माधव नेपाल लगायत १४ सांसदलाई पार्टीले गरेको कारबाही अघि बढाउन दवाव दिन सभामुखको कार्यकक्ष घेराउ गरिएको एमाले सांसद तथा पूर्वमन्त्री गोकुल बाँस्कोटाले जानकारी दिए ।
सभामुखको च्याम्बर घेराउ गर्नेमा बाँस्कोटा सहित खगराज अधिकारी, लालबाबु पण्डित, शान्ता चौधरी, थममाया थापा, निरु पाल, राजेन्द्र गौतम, कृष्ण पोखरेल लगायत छन् ।
कारवाही परेका १४ जना सांसदहरुलाई चाँडो पदमुक्त गर्न बिहीबार पनि एमालेले सापकोटाको ध्यानाकर्षण गराएको थियो । एमालेका नेता तथा संसदीय दलका प्रमुख सचेतक विशाल भट्टराई तथा सचेतक शान्ता चौधरी, महेश बस्नेत लगायतले सभामुख सापकोटालाई भेटेर कारवाहीमा परेका सांसदलाई पदमुक्त गर्न दवाव दिएका थिए ।
एमाले अध्यक्ष ओलीले विहीबार एक सार्वजनिक कार्यक्रममा बोल्ने क्रममा सभामुख सापकोटालाई न्यायाधीश वा माओवादीजस्तो ‘नपल्टिन’ चेतावनी दिँदै १४ जनामाथिको कारवाहीको सूचना तत्काल नटाँसिए संसद चलाउन नदिने बताएका हुन् ।
