देउवा सरकारले विभूषणहरुको नाकमा कालो पोतेको,एमालेका अध्यक्ष केपी शर्मा ओली

नेकपा एमालेका अध्यक्ष केपी शर्मा ओलीले सरकारले सातौं संबिधान दिबसको अबसरमा दिएको पदक सबैका लागि लज्जाजनक भएको बताएका हुन् । साथै उनले सरकारले अलंकार, पदक, विभूषणहरुको नाकमा कालो पोतेको र यसको इतिहासले निर्मम मूल्यांकन गर्ने बताए ।

सातौं संबिधान दिबसको अबसरमा आइतवार एमालेले गरेको कार्यक्रममा बोल्दै ओलीले भने, ‘अलंकार, पदक, विभूषणहरुको नाकमा कालो पोतेको । ती विभुषणहरुले लज्जा मानेको हेर्नुस् त ।

ओलीले संबिधान दिबसको दिन शहीदका सन्तान, आमाबुबाहरुले गर्व गर्न पाउनुपर्ने र घाइतेहरुले सम्मानित हुन पाउनुपर्ने बताए । तर सरकारले कसैको बा त कसैका श्रीमतीलाई मानपदवी दिएको भन्दै उनले भने, ‘आज बाबुको मुख हेर्ने दिन हो ?श्रीमीतीको मुख हेर्ने दिन हो?छोराछोरीको मुख हेर्ने दिन हो ?

आफ्नो सरकारविरुद्ध खोइरो खन्ने पत्रकारहरुलाई ठूलठूला पदक दिएको उनले बताए । ‘झगडियाहरु सम्मानित, तथानाम बहस गर्नेहरु सम्मानित, जे पायो त्यही बोल्नेहरु सम्मानित, २/४ जना छुटेको जस्तो लाग्यो, किन छोडेको होला ?’ ओलीले अघि भने, ‘मुद्दा जिताइदिने, हराइदिने सम्मानित ।’

बाहिर म पदको भोको होइन, जनताका लागि हुँ भन्नेहरुले मौका पाउँदा आफ्नालाई मात्र हेरेको उनले बताए । उनले अघि भने, ‘जलाइराखेका छन् आज मानपदवीहरु । क्या घाँटीमा पुगिने भयो बा!बोल्न सक्ने भए उफ्रिन्थे ती । तर बोल्न सक्दैनन् ।’