काठमाडौँः श्रम, रोजगार तथा सामाजिक सुरक्षामन्त्री कृष्णकुमार श्रेष्ठ (किसान) ले आपत्तिजनक अभिव्यक्ति दिएका छन् । उनले गृहजिल्ला तनहुँमा सोमबार आयोजित कार्यक्रममा एमाले अध्यक्ष केपी शर्मा ओलीको आलोचना गर्ने क्रममा मधेसी समुदायप्रति लक्षित गरेर त्यस्तो अभिव्यक्ति दिएका हुन् ।
‘उनले दुईतिहाइको सरकार छाडेर देशै टुक्य्राउ भन्ने मधेसीहरूलाई १२र१४ जना मन्त्री बनाएको बताए । उनले अध्यक्ष ओलीले मन्त्रीमा श्रीमान् श्रीमतीलाई आलोपालो अवसर दिएको र मन्त्रीलाई खरिदार, मुखिया जस्तो सरुवा गरेको टिप्पणी समेत गरेका थिए ।
मन्त्रीको अभिव्यक्तिबारे बुझेर पार्टीले कदम चाल्ने महासचिव वेदुराम भुसालले बताए । ‘उनले भने, त्यो त मलाई शब्दशः थाहा छैन तर केपी ओलीले उपप्रधानमन्त्री बनाउनुभएका राजेन्द्र महतोले यो देशबाट स्वराज, मुक्ति आन्दोलन चलाउँछु भन्नुभएको थियो, त्यसैलाई संकेत गर्नुभएको होला,’ उनले थपे, ‘उहाँले के बोल्नुभएको हो र कस्तो आशय छ, त्यो सोध्नुपर्ला ।’
मन्त्री श्रेष्ठको अभिव्यक्ति नश्लीय र आपत्तिजनक भएको भन्दै आलोचना सुरु भएको छ । सामाजिक सञ्जालमा श्रेष्ठको उक्त अभिव्यक्तिको चर्को विरोध भइरहेको छ । मन्त्री श्रेष्ठसँग तनहुँमा दिएको अभिव्यक्तिबारे बुझ्न खोज्दा उनले फोन उठाएनन् ।
बहालवाला मन्त्रीले विवादास्पद अभिव्यक्ति दिएको यो पहिलोपटक होइन । विगतमा पदीय मर्यादाविपरीत हुने अभिव्यक्ति दिँदा कतिपयले मन्त्री पद नै गुमाएका छन् ।
